ئەمڕۆ کە کۆتایی بە تاقیکردنەوە گشتییەکانی قۆناغی دوانزەی ئامادەیی خولی یەکەم بە هەموو بەشەکانیەوە دەهێنن، دەمەوێت بە دڵێکی پڕ لە شانازییەوە پەیامێکتان ئاراستە بکەم.
خوێندکارانی خۆشەویست ,ئەمڕۆ ئێوە تەنها تاقیکردنەوەیەکتان تێنەپەڕاندووە، بەڵکو وێستگەیەکی گرنگی ژیانتان بە سەرکەوتوویی بڕیوە، ئەو ماندوێتی و شەونخونی و ئارامگرتنەی ئێوە لەم ماوەیەدا نیشانەی ئیرادەی بەهێز و خۆبەخشی ئێوە بوو بۆ بنیاتنانی داهاتوویەکی شایستە، ئێمە لە پەروەردەی سلێمانی بە شانازییەوە چاودێری هەوڵەکانتانمان کردووە و دڵنیاین کە ئێوە داهاتووی ئەم وڵاتە گەش دەکەن.
بە پێویستی دەزانم سوپاس و دەسخۆشی خۆم ئاراستەی سەرجەم بەڕێوەبەری پەروەردەی قەزاکان، لیژنەی باڵای تاقیکردنەوەکان، سەرپەرشتیاران، بەڕێوەبەر و یاریدەدەر و چاودێری هۆڵەکان، فەرمانبەران و کارگوزارە بەڕێزەکان بکەم، بە هەوڵ و ماندووبون و دڵسۆزی و شەونخونی ئێوە توانیمان ئەم پڕۆسەیە بە سەرکەوتوویی کۆتای بێت، وەهەروها سوپاس و دەستخۆشی بێ پایانم بۆ دایک و باوکانی خوێندکاران کە لەم ساتە سەختانەدا پشتیوانی پۆڵایینی ئێوە بوون، سوپاس و دەستخۆشی زۆرمان بۆ بەڕێوەبەرایەتی گشتی پۆلیسی سلێمانی و هەموو ئەو کەس ولایەنانە دەکەم کە هاوکارو پشتیوانمان بوون.
هیوادارم پشوویەکی شایستە بدەن و بە وزەیەکی نوێوە، ئامادەبن بۆ قۆناغەکانی تری ژیان، سەرکەوتوو بن و هەمیشە شانازیی ئێمە و کوردستان بن.
نەژاد عبدالله محمد
بەڕێوەبەری گشتی پەروەردەی سلێمانی
٥ی ٧ی٢٠٢٦