پەروەردەی سلێمانی هەڵمەتێکی کۆکردنەوەی هاوکاریی بۆ رۆژئاوای کوردستان دەستپێدەکات

بەڕێوەبەرایەتی گشتی پەروەردەی سلێمانی هەڵمەتێکی سەرتاسەریی لە ناوەندەکانی خوێندن بۆ کۆکردنەوەی هاوکاریی بۆ رۆژئاوای کوردستان رادەگەیەنێت.
مامۆستا دڵشاد عومەر، بەڕێوەبەری گشتی پەروەردەی سلێمانی، رایگەیاند: ئەمڕۆ 15/10/2019، بە بەشداریی سەرجەم بەڕێوەبەرێتی پەروەردەکان کە پێکهاتوە لە (12) پەروەردە و (15) سەرپەرشتیاریی، بۆ خزمەتی رۆژئاواو وەک ئەرکێکی نەتەوەیی و مرۆڤانە بڕیارماندا لە ناوەندەکانی خوێندن و بەبەشداریی مامۆستایان و خوێندکاران و کەسوکاریان هەڵمەتێکی کۆکردنەوەی پارە بە شیوەیەکی ئارەزوومەندانە ئەنجام بدەین.
وتیشی :”هەڵمەتەکە لە سبەینێ چوارشەممەوە دەستپێدەکات و رۆژی شەممە کە رۆژی هەڵکردنی ئاڵای کوردستانە سەرجەم بەڕێوەبەری قوتابخانەکان وتارێک بۆ جۆشدانی بیری نەتەوایەتی و بەرگریکردن لە رۆژئاواو ئیدانەکردنی ئەو جینۆسایدەی کە بەسەر نەتەوەکەماندا دێت پێشکەش دەکەن”.
مامۆستا دڵشاد عومەر رایگەیاند: تا کۆتایی دەوامی رۆژی شەممەی داهاتو هەڵمەتەکە لە ناوەندەکانی خوێندن بەردەوام دەبێت دواتر لە هەر سنورێکدا لیژنەیەکی سێ کەسی لە بەڕێوەبەری پەروەردەی قەزاو نوێنەرێکی یاسایی و ژمێریارێک ئەو پارەیە کۆدەکەنەوە، دەرئەنجامەکانی لە کۆنگرەیەکی رۆژنامەوانیدا رادەگەیەنین و کۆمەكەکە دەدەین بە نوێنەری کانتۆنەکانی رۆژئاوای کوردستان و مانگی سوری کوردی.
سەبارەت بە کۆکردنەوەی پارە بۆ رۆژئاوای کوردستان، بەڕێوەبەری گشتی پەروەردەی سلێمانی رایگەیاند: دایک و باوک و خوێندکاران و مامۆستایان و فەرمانبەران ئازادن لەوەی بەچەند بەشداریی دەکەن، بۆیەش ئەم هەڵمەتە بە پارە کرا، چونکە هاوکاریی دیکەی جۆراوجۆر زۆرن، رۆژئاواش ئازادە لەوەی پارەکە دەدەن بە دەرمان یان هەر پێداویستییەکی دیکە.