ئەمڕۆ سێشەممە ۷ـی ٤ـی ۲۰۲٦ مامۆستا نەژاد عبدالله بەڕێوەبەری گشتی پەروەردەی سلێمانی بۆ جاری دووەم لەم هەفتەیەدا سەردانی بینای ئامادەیی قەرەگۆلی لە سنووری بەڕێوەبەرێتی پەروەردەی شارەزوور کرد.
لەو سەردانەدا کە هەریەک لە ئەندازیار محەمەد عبدالله نوێنەری ئانزۆ فاوندەیشن کە دامەزراوەیەکی قازانج نەویستە و لەلایەن خاتوو تۆڵە شێخ جەنابـەوە خاوەندارێتی دەکرێت و مامۆستا جەمال پێنجوێنی بەڕێوەبەری بەشی خزمەتگوزاری لە بەڕێوەبەرایەتی گشتیمان هاوڕێیەتیان دەکرد، لەلایەن مامۆستا نەبیل حەمەساڵح بەڕێوەبەری پەروەردەی شارەزوور و ئومێد عەبدولڕەحمان سەرپەرشتیاری یەکەم و بەڕێوەبەر و مامۆستایانی ئامادەیی قەرەگۆل و قوتابخانەی خاکی بنەڕەتییەوە پێشوازییان لێکرا.
بۆ لە نزیکەوە ئاگاداربوون لە دواین قۆناغی پرۆسەی گۆڕینی ڕێڕەوی ئاوی خوێندنگەکەیان بەسەرکردەوە، جێگەی دەستخۆشییە کە لەسەر داوای بەڕێوەبەری گشتی پەروەردەی سلێمانی ئانزۆ فاوندەیشن بڕیاریدا ئەرکی دروستکردنەوەی دیواری خوێندنگەکە و پڕکردنەوەی ئەو چاڵانەی بەهۆی لافاوەوە دروست بوون و نۆژەنکردنەوەی تەواوی بیناکەبگرێتە ئەستۆ.
بەڕێوەبەری پەروەردەی شارەزوور و خەڵکی ناوچەکە، سوپاس و پێزانینی قوڵی خۆیان ئاراستەی بەڕێوەبەری گشتی و ئانزۆ فاوندەیشن کرد بۆ خەمخۆری و خێرا بەدەمەوەهاتنیان بۆ پاراستنی گیانی خوێندکاران و نۆژەنکردنەوەی خوێندنگەکە.
ئەمەش لە کاتێکدایە بەهۆی لافاوی چەند ڕۆژی ڕابردوو ئامادەیی قەرەگۆل زیانی بەرکەوتبوو.
