بۆ بەرزڕاگرتنی یادی ١٢٨ ساڵەی ڕۆژنامەگەری کوردی، ئەمڕۆ چوارشەممە ۲۲ـی ٤ـی ۲۰۲٦ مامۆستا نەژاد عبدالله بەڕێوەبەری گشتی پەروەردەی سلێمانی ڕێزلێنانی پێشکەش بە ژمارەیەک ڕۆژنامەنووس و میدیاکاران کرد کە ڕۆڵی بەرچاویان هەبووە لە خزمەتکردنی پرۆسەی خوێندن و گەیاندنی دەنگی مامۆستایان و قوتابیان و خوێندکاران و ڕووماڵکردنی چالاکییە پەروەردەییەکاندا.
لە میانەی دیدارەکەدا، بەڕێوەبەری گشتی دەستخۆشی لەو ڕۆژنامەنووسانە کرد کە بە وریایی و ئەمانەتەوە پەیامی پەروەردەیان گەیاندووە، مامۆستا نەژاد جەختی لەوەش کردەوە کە میدیا و پەروەردە دوو کایەی تەواکەری یەکترن بۆ گەشەپێدانی هۆشیاریی نەتەوەیی و هیوای خواست میدیاکاران هەمیشە لە خزمەتی زانست و ڕاستگۆییدا بن، وەهەروەها بەڕێوەبەری گشتی پیرۆزبایی و ڕێز و سوپاسی ئاراستەی ڕۆژنامەنووسان کرد و هیوای سەرکەوتنی بۆ خواستن.
لە بەرامبەردا میدیاکاران و ڕۆژنامەنووسانی ئامادەبوو سوپاس و پێزانینی خۆیان بۆ ئەم دەستپێشخەرییەی بەڕێوەبەرایەتی گشتی پەروەردەی سلێمانی دەربڕی و ڕایانگەیاند ئەرکی ئێمەیە وەک چاوی کۆمەڵگە بەدواداچوون بۆ کێشە و سەرکەوتنەکانی کەرتی پەروەردە بکەین، ئەم ڕێزلێنانەش هاندەرێکی گەورەیە بۆ ئەوەی بە بایەخەوە تیشک بخەینە سەر پرۆسەی پەروەردە و خزمەتکردنی نەوەکانمان.
