ئەمڕۆ چوارشەممە ١٥ـی ٧ـی ٢٠٢٦ مامۆستا نەژاد عبدالله بەڕێوەبەری گشتی پەروەردەی سلێمانی لە دیوانی بەڕێوەبەرایەتی گشتی لەگەڵ بەڕێوەبەری سەرجەم بەشەکاندا کۆبوونەوەیەکی ئەنجامدا.
لە کۆبوونەوەکەدا گفتوگۆ لەسەر چۆنیەتی باشترکردنی کارکردن و خێراکردن و ڕاییکردنی مامەڵەی هاووڵاتیان و مامۆستایان کرا.
بەڕێوەبەری گشتی جەختی لەسەر پابەندبوون بە ئەرک و بەرپرسیارێتییەکان و هەماهەنگی زیاتری نێوان بەشەکان کردەوە بە مەبەستی بەرزکردنەوەی ئاستی خزمەتگوزارییە پەروەردەیی و کارگێڕییەکان، هەروەها مامۆستا نەژاد تیشکی خستەسەر كاروچالاكییەكانی بەڕێوەبەرایەتی گشتیمان كە لە ماوەی ساڵێكدا ئەنجامدراوە لەدەرەوەی بودجەی پەروەردە بۆ خزمەتكردنی ناوەندەكانی خوێندن و خوێندكاران و مامۆستایان سەرپەرشتیار و فەرمانبەران و دواتر باس لە پلانی داهاتووی بەڕێوەبەرایەتییەکە كرا و هاوکات گوێبیستی سەرنج و تێبینی و ئاستەنگەکانی بەردەم بەشەکان بوو بۆ چارەسەرکردنیان.
بەڕێوەبەری گشتی لە کۆتاییدا سوپاسی ماندووبوونی بەڕێوەبەری بەشەکانی کرد و ڕایگەیاند ئەرکی سەرشانی هەموومانە کە بەوپەڕی دڵسۆزییەوە کار بۆ پێشخستنی کەرتی پەروەردە بکەین و خزمەتگوزارییەکان بگەیەنینە ئاستێکی شایستە بە مامۆستایان و خوێندکاران.